Boorn & Boerschop 2015-03: Oet de oale deus. Jubileum bij Spanjaard

Auteur: Henk ten Thije

”Foto’s, foto’s het bint papiern dingn
mer elkn foto hef veur alleman aait ne herinnering.”
(oet ’n leedje van Jan Kleinman)

Vandaag an’n dag is t nog mer zealdn daj in de kraant least dat leu viert dat ze 25 of 40 joar wearkt biej n zölfdn baas. Vrogger, loaw zegn, in n veurigen eeuw, was dat slagmoals raak. Mangs stun dr wa twee tot dreemoal in de wekke n stuk oawer jubilarissen in de Boornse kraant, ’t Dagblad van t Oostn, De Tweantse kraant of t Hengeloos Dagblad. Dr wodn ok meer andach an besteed as rechtevoort. t Bedrief leut op dizze menier zeen dat ze waardeern dat de leu zo lang biej heur wearkn.
Het wadn aandre tiedn, mer toch . . . . . . . Ze maakn dr weark van!

En dat gung in de viefteger joarn, ongeveer zo:
Meneer Nijhuis (Niejhoes van de Muske) is 40 joar in deenst biej Spanjaard. Hee is hoofdtouwbaas in de damastweaweriej, n onderdeel van de weaweriej, van t bedrief dat ooit t grootste van Boorn was. Niejhoes hef veertig joar lang n weg noar “t febriek” ofleg en is veertig joar teegnoawer t station langs de portier de poort inloopn en noe wodt hee doorvuur bedaankt.

Op n dag van t jubileum hef Niejhoes natuurlijk vriej. Den monn trek hee, in plaats van ziene wearkkleer, t beste pak an en wod hee met ziene vrouw, um 10 uur van t hoes ophaalt met n taxi van garagebedrief Ellenbroek dat vestigd is op n hook van n Cuba teegnoawer drukkeriej Over. Zo komp t echtpaar Niejhoes dan noa veertig joar trouwn deenst met n taxi veur t hoofdketoor van Spanjaard an de Stationsstroat. Ellenbroek helpt met oetstappn en zo goat ze via de hoge zwatte duurn t bedrief binn. Dat is nog is wat aans dan langs de portier.

Ze wodt welkom heetn deur Jo Weghorst, tillefoonjuffrouw van Spanjaard. Efkes later komp juffrouw Maneschijn, moatschoppelijk wearkster en personeelschef Hagreis en dee nemt t echtpaar Niejhoes met noar t ketoor van n hoogsten baas, direkteur Bosma. Door kwam dan ook n chef van de weaweriej, bedriefsleider Hartkamp, nog biej zittn. Met n köpke koffie van Landkroon, kantinebaas van Spanjaard, wödn t dan n geneuglijk uurkn saamn met de vrouw biej n hoogstn baas van t bedrief. En dat haj dan, duch miej, ook wa verdeent. Van t bedrief kreej toerndertied as kedo n oetgebreid Textielpakket en dat was nig verkeerd.

Noa t geneuglijk ‘samenzijn’ biej de direktie, gung t dan met n bedrijfsleider t febriek in en dan wödn ie op de ofdeling deur de collega’s ook nog in de zun zet. De ofdeling wödn stop zet! In dit geval de hele weaweriej en wödn n jubilaris, temiddn van t voltallige personeel toosprökkn deur n bedriefsleider. As bliek van waardering beud hee naams alle collegas een kedo an.

(In de wekke veur t jubileum wör dr met de pet roondgoan. Van t totale bedrag wödn t kedo koch. t Was gebroek daj per persoon n kwartje(!) in de pet deedn). Noa de plechtigheid wödn de töwwe wier anzat en gung alleman wier an t weark.

Dan pakn de man den dr met belast was de tillefoon, beln n plaatselijkn correspondeant van de kraant en deu verslag van t jubileum biej Spanjaard. Den spöln t wier duur nor de redacties van de verschillnde dag en wekblaadn. En n aandern dag stun dr n stuk in de kraantn. Mooi vuur n jubilaris, mooi vuur t bedrief.

Mangs gungn ze ook nog met meka op n foto. Op oonderstoandn petret zeej jubilaris Niejhoes, umringd deur ziene vakbreurs. Let op t feestelijke Rood Wit Blauw op n achtergroond en n versierdn stool van n jubilaris

En dan nog efkes dit:

t was gebroekelijk dat leu in de loop van t joar woarin ze jubileerdn, ne Koninklijke oonderscheiding kreegn. Wiej hebt nooit begreppn woorum dr verschil wödn maakt tussen bazen en arbeiders. Arbeiders de veertig joar in deenst wadn kreegn brons en bazen kreegn zilver.

Met daank an:

Arend Kevelham, Johan Kevelham en Arend Wisman.

(–> naar PDF-versie van deze publicatie)

(–> naar Inhoudsopgave 2015-03)

(–> naar Boorn & Boerschop pagina)