Auteur: Johan Kwast
Pöale door bint der nen hoop van. Nemt noe de hoolten wearepöale, schier in ’t gelid, krammen in de hoed, nen droad der langs en kloar is ’t gleend- weark.
Op de heuke steet nen hookpoal. De schoorpöale deent vuur oondersteuning. Donateurs, dat bint ok schoorpöale. Bowpercelen zet ’t Kedaster oet. Ze broekt rood-witte piketpöalkes.
Nen poalböarger is nich nen poal mear ene den bin- nen den stadsgreanzen wont. An ne grenze steet vaak enen loakpoal. Met ne greanscorrectie schoewt ze de pöale op.
De greune grenze keant gin pöale. Doar sliept ze zo ongezeen ’n poal oawer.
Amsterdammertjes bint tapse pöalkes in Mokum. Meest vuur ’n sier stoat dee doar.
Vuur fietsepöalkes möj oe waren.
Zee’j op ’n voetbalveld twee lange pöale met ne lat der oawer? Doar möt ze ’n bal tuskenduur zeen te wearken. Lukt dat, dan roopt ze “gool”.
Nen greansrechter heult de ziedliene in de gaten en vlagt vuur boetenspel.
Greansrivieren he’j ok. ’n Iessel en de Reest bint der vuurbeelden van.
Nen greansjager was nen rieksveeldwachter.
De greansstreng is ne zenuwbaane an wiers kaan- ten van ’n ruggenstraank.
Oale vakwearkhuuze en ’n loshoes stoat lös. De dakgebeenten röst op ’t geboont.
Schaampstene bint et behoold vuur de muren nöast ’n nienduur.
Nen slagboom is ok nen poal. Doarachter he’j niks te zeuken.
Jachpöale, grote stenen pöale, dee begreanst de jachgroond. Op groond van laandgood Twickel in Ambt-Deelden, doar stoat ze.
Laandweren bint natuurlijke verdedigingswearken tegen water en vee. De waterlinie behodt oons laand tegen völker dee ons op ’n jas wilt.
Nen toen is de umheining um oewen goarden. Greanzen verleggen gif ’t ok. Zölfs noar de moan wilt ze. Wat leu möt der lopende hen.
Bloas ie ’n lesten oadem oet, goa’j de leawensgrean- ze oawer, dan kom ie “oet de tied”.
Biej greanskwesties geet et um ’t miene en ’t diene. Weark vuur “De Rijdende Rechter”.
Löpt ’t oe oawer de köarve, dan he’j te völ an ’n kop. Met ’n kot lontje kö ‘j weanig velen.
Deank ie wieder te springen van ’n polsstok laank is? ’t Wil oe kullen.
Hool ie ’t der oawer hen, dan he’j nich good ‘e richt. Geet der ene vrömd, dan vret-e oonder ’n droad hen. As ’t oe anbraand is, dan he’j de tied verzetten. “Goat hen en bettert oe!”
Greansbal is ’n keenderspel met ne achterliene. Kaatsers neumt dat de boawenliene. Sloat ze ’t bäl- leke met enen klap oawer dee greanze dan maakt ze ne ‘boppeslag’.
Weeldplassen mag ok al nich meer. Wat doo’j a’j plastebletten sloekt? Ie kuiert woareargens boetenof en ie möt zo neurig. Stoandebeens of op de hoeke, pissen dat doo’j.
Öasen is zwoar wearken of, an de weend stoan. Alns hef zo zien eande, mear ne wos hef der twee. Der is ne tied van kommen en ne tied van goan. Dee greanze gealdt ok vuur miej. Ik doo der zovöl biej en zet der ne peunt achter●
(–> naar PDF-versie van deze publicatie)
(–> naar Inhoudsopgave 2017-03)
(–> naar Boorn & Boerschop pagina)