Boorn & Boerschop 2013-01: Alles kump zoas het kump

Alles kump zoas het kump

(Jan Kleinman)

Wat blif der oawer van oonze dreumen?
Van wa’w verwocht hebt, hoo of wat,
van alles wa’w vuur hebt steld,
alle verwachtingen dee’w hebt ‘ehad.

Mer alles kump toch zoas ’t kump.
Ie hebt het zölm nich oet ‘ezoch.
Met al zien veurs en al zien tegens
’t is altied aans, dan da’j hebt verwocht.

Veural a’j jong bint, he’j illusies.
Ie stelt oe vaak van alles veur.
Hoo of het mut en hoo’j ’t wilt hebben,
van moaneschien en rozengeur.

De jonge man dreumt van zien leefste,
de zakenman van zien succes,
de oale leu dreumt van de keender,
dat ze geluk in ’t leaven hebt.

Ie dreumt van vrede in de wereld.
Geliek van welvaart en van macht.
Dat ’t good mag goan met alle meenske,
biej tegenslag en nood van kracht.

Mer alles kump, zoas het kump.
Dat he’j mees zölm nich in de hand.
Het geluk zoch oe mees weinig op,
dat mu’j zölm zeuken met verstaand.